وش الحيله

وش الحيله إذا قلبي يحب وصادق الإحساس ؟
كأنك بس في الدنيا وجروحي ما تبي غيرك
أجيك إيدي على قلبي .. وأكتم داخلي الأنفاس
أموت .. وما أبيِّن لك وأمسِّي لك على خيرك
أسلِّم لك أنا نفسي .. ويعاتب قلبي الوسواس
وأجي طاير سما قلبك حبيبي .. إحظِنَه طيرك
فقير .. وجيت لك حافي وقلبي جوهرة ألماس
عطيتك كل ما عندي / عساي أحظى بتفكيرك
شربت الكاس لعيونك وأدري فيه سِـمْ الكاس
كأنه .. منجبر قلبي .. على حُبك .. وتقديرك
كثير أشكال مرَّتني .. ومرَّتني كثير أجناس
رفض قلبي يكلِّمْهُم .. رفض واللـه تغييرك
خسرت الكل صدِّقني وقلبي .. أعلن الإفلاس
وإنت الباقي في عمري وعلي يا كُبر تأثيرك
كأني بن ربيعه كليب وكأنك بـ الغَدِر جسَّاس
أعبِّر لك بـ هذا البيت وإنتَ شنهو تعبيرك ؟
قضى كل الأمل فيني من رجولي إلين الراس
كثيره حيل غلطاتك .. وتصدمني بـ تبريرك
تطيح الناس من كثر التعب أو ما تطيح الناس ؟
وأنا مثل الشجر واقف رغم هجرك وتقصيرك